سال 2026 کے آغاز کے ساتھ ہی آئرلینڈ دنیا بھر کے ہنرمند افراد اور تارکین وطن کے لیے ایک پسندیدہ منزل کے طور پر ابھرا ہے۔ آئرلینڈ کی معیشت تیزی سے ترقی کر رہی ہے اور وہاں کام کے مواقع بھی بہت زیادہ ہیں لیکن جب بات فیملی کو وہاں بلانے کی آتی ہے تو قوانین کافی سخت ہو جاتے ہیں۔ بہت سے پاکستانی اور انڈین شہری جو آئرلینڈ میں مقیم ہیں وہ اپنے خاندان کو وہاں بلانا چاہتے ہیں لیکن معلومات کی کمی کی وجہ سے ان کی درخواستیں مسترد ہو جاتی ہیں۔ آئرلینڈ کا جوائن فیملی ویزا یا فیملی ری یونین ویزا ایک ایسا قانونی راستہ ہے جس کے ذریعے آپ اپنے شریک حیات، بچوں اور کچھ خاص حالات میں بوڑھے والدین کو اپنے پاس بلا سکتے ہیں۔ چونکہ آئرلینڈ اپنی امیگریشن پالیسیوں کو تبدیل کر رہا ہے اور اس حوالے سے ہم پہلے ہی اپنی ایک رپورٹ آئرلینڈ امیگریشن نیوز 2025 میں ورک پرمٹ کی تفصیلات میں بتا چکے ہیں کہ کس طرح تنخواہ کی حد میں اضافہ کیا گیا ہے، لہذا 2026 میں فیملی کو بلانے کے لیے آپ کو ان نئے قوانین کا علم ہونا بہت ضروری ہے۔ یہ تفصیلی گائیڈ آپ کو اے سے لے کر زیڈ تک ہر چیز سمجھائے گی تاکہ آپ خود ویزا اپلائی کر سکیں اور ایجنٹس کے پاس جانے سے بچ سکیں۔
کون لوگ اپنی فیملی کو آئرلینڈ بلا سکتے ہیں
سب سے پہلے یہ سمجھنا ضروری ہے کہ ہر وہ شخص جو آئرلینڈ میں ہے وہ اپنی فیملی کو نہیں بلا سکتا۔ آئرلینڈ کے محکمہ انصاف نے اسپانسرز یعنی بلانے والوں کو مختلف کیٹیگریز میں تقسیم کیا ہے۔
سب سے پہلی کیٹیگری آئرش شہریوں کی ہے۔ اگر آپ کے پاس آئرلینڈ کا پاسپورٹ ہے تو آپ کو اپنی فیملی بلانے کا فوری حق حاصل ہے اور آپ پر شرائط قدرے نرم ہوتی ہیں۔ دوسری اور سب سے اہم کیٹیگری ان لوگوں کی ہے جو ورک پرمٹ پر وہاں مقیم ہیں۔ اگر آپ کے پاس کریٹیکل سکلز ایمپلائمنٹ پرمٹ ہے جسے عام زبان میں گرین کارڈ بھی کہا جاتا ہے تو آپ آئرلینڈ پہنچتے ہی اپنی فیملی یعنی بیوی اور بچوں کے ویزے کی درخواست دے سکتے ہیں۔ آپ کو کسی انتظار کی ضرورت نہیں ہوتی۔ تاہم اگر آپ کے پاس جنرل ایمپلائمنٹ پرمٹ ہے تو آپ کو اپنی فیملی بلانے کے لیے کم از کم بارہ ماہ یعنی ایک سال تک آئرلینڈ میں انتظار کرنا ہوگا اور یہ ثابت کرنا ہوگا کہ آپ کی نوکری مستحکم ہے۔
- مزید پڑھئے
- برطانیہ اسکلڈ ورکر ویزا 2025: تنخواہ کی نئی شرائط اور قوانین کی مکمل گائیڈ
- 2025 میں برطانیہ میں نیٹ مائگریشن 204,000 تک گر گئی: سرکاری اعداد و شمار کی تفصیل
- برطانیہ – نئے قوانین کے تحت پناہ کے متلاشیوں کو آبادکاری کے لیے 20 سال انتظار کرنا پڑے گا
- برطانیہ میں تاریخی قانون سازی: ‘اسسٹڈ ڈائنگ بل’ پارلیمنٹ میں بحث کے لیے منظور
تیسری کیٹیگری ان لوگوں کی ہے جن کے پاس سٹیمپ فور یا سٹیمپ فائیو ہے یعنی وہ وہاں کے مستقل رہائشی ہیں۔ یہ لوگ بھی اپنی فیملی کو بلا سکتے ہیں بشرطیکہ وہ مالی شرائط پر پورا اترتے ہوں۔ اگر آپ ورک پرمٹ کے حوالے سے مزید جاننا چاہتے ہیں تو آئرلینڈ ورک پرمٹ کے بارے میں ہمارا پرانا مضمون ضرور پڑھیں۔
2026 کے لیے مالی اور تنخواہ کی نئی شرائط فیملی ویزا کے مسترد ہونے کی سب سے بڑی وجہ کم آمدنی ہے۔ آئرلینڈ کی حکومت کا اصول بہت واضح ہے کہ وہ کسی بھی ایسی فیملی کو آنے کی اجازت نہیں دے گی جسے بعد میں حکومت سے مالی مدد یا سوشل ویلفیئر مانگنا پڑے۔ 2026 کے لیے مالی شرائط کو مزید سخت کر دیا گیا ہے۔ پہلے یہ سمجھا جاتا تھا کہ سالانہ تیس ہزار یورو کمانے والا شخص فیملی بلا سکتا ہے لیکن اب ایسا نہیں ہے۔ نئے قوانین اور مہنگائی کو دیکھتے ہوئے اب اسپانسر کے لیے ضروری ہے کہ اس کی تنخواہ میڈین انڈسٹریل ویج سے زیادہ ہو۔ عملی طور پر اگر آپ اپنی بیوی اور ایک بچے کو بلانا چاہتے ہیں تو آپ کی سالانہ تنخواہ تقریبا چالیس ہزار یورو سے چوالیس ہزار یورو کے درمیان ہونی چاہیے۔ یہ وہ رقم ہے جو ٹیکس کٹنے سے پہلے گراس انکم کہلاتی ہے۔ اگر آپ کے بچے زیادہ ہیں تو ہر بچے کے لیے درکار آمدنی کی حد بڑھتی جائے گی۔ اس کے علاوہ سب سے مشکل کام بوڑھے والدین کو بلانا ہے۔ آئرلینڈ کے سرکاری پالیسی ڈاکومنٹ کے مطابق والدین کو بلانے کے لیے آپ کو یہ ثابت کرنا ہوتا ہے کہ وہ مکمل طور پر آپ پر انحصار کرتے ہیں اور ان کا اپنے ملک میں کوئی اور سہارا نہیں ہے۔ اس کے لیے مالی شرط بہت زیادہ ہے۔ اگر آپ ایک والد یا والدہ کو بلانا چاہتے ہیں تو ٹیکس کٹنے کے بعد آپ کی جیب میں ساٹھ ہزار یورو سالانہ بچنے چاہئیں اور اگر دونوں کو بلانا ہے تو یہ رقم پچھتر ہزار یورو سالانہ ہونی چاہیے جو کہ ایک بہت بڑی رقم ہے اور بہت کم لوگ اس پر پورا اترتے ہیں۔
رہائش اور گھر کی شرائط آمدنی کے بعد دوسرا بڑا مسئلہ رہائش کا ہے۔ آپ اپنی فیملی کو کسی ایسے گھر میں نہیں بلا سکتے جہاں آپ پہلے ہی دوستوں کے ساتھ شیئرنگ میں رہ رہے ہوں۔ ویزا افسر آپ سے کرائے کا ایگریمنٹ مانگے گا جس پر واضح لکھا ہو کہ اس گھر میں صرف آپ اور آپ کی فیملی رہے گی۔ اسے ایکسکلوسیو آکوپیشن کہا جاتا ہے۔ گھر کا سائز بھی اہمیت رکھتا ہے۔ اگر آپ میاں بیوی ہیں تو ایک بیڈ روم کا اپارٹمنٹ کافی ہے لیکن اگر ساتھ بچے بھی ہیں تو آپ کو دو بیڈ روم کا گھر درکار ہوگا۔ یہ گھر مقامی کونسل کے معیار کے مطابق ہونا چاہیے اور اس میں ہجوم نہیں ہونا چاہیے۔ اگر آپ نے رہائش کا مناسب ثبوت پیش نہیں کیا تو ویزا مسترد ہو جائے گا۔
درخواست دینے کا مرحلہ وار طریقہ
اب آتے ہیں سب سے اہم حصے کی طرف کہ ویزا اپلائی کیسے کرنا ہے۔ آئرلینڈ کا ویزا سسٹم آن لائن ہے جسے اے وی اے ٹی ایس کہا جاتا ہے۔ سب سے پہلے آپ کو اے وی اے ٹی ایس آن لائن اپلیکیشن فیسیلٹی پر جانا ہوگا۔ وہاں جا کر آپ ویزا کی قسم لانگ سٹے ڈی منتخب کریں گے۔ اس کے بعد آپ کو وجہ بتانی ہوگی جس میں آپ جوائن فیملی منتخب کریں گے۔ فارم میں تمام تفصیلات درست طریقے سے پُر کریں جیسے کہ پاسپورٹ نمبر، تواریخ اور ایڈریس وغیرہ۔ فارم مکمل کرنے کے بعد ایک سمری شیٹ جنریٹ ہوگی اسے پرنٹ کر لیں۔ اس سمری شیٹ پر آپ کو دستخط کرنے ہوں گے اور اپنی تصویر لگانی ہوگی۔ اس شیٹ پر یہ بھی لکھا ہوگا کہ آپ نے اپنے کاغذات کس دفتر میں بھیجنے ہیں۔ عام طور پر یہ کاغذات ڈبلن کے ویزا آفس یا آپ کے ملک میں موجود آئرش سفارت خانے کو بھیجے جاتے ہیں۔
کاغذات کی تیاری اور فہرست
اس ویزا کے لیے کاغذات کی تیاری میں بہت احتیاط کی ضرورت ہے۔ یاد رکھیں کہ آئرلینڈ فوٹو کاپیاں قبول نہیں کرتا آپ کو تمام کاغذات اصل یعنی اوریجنل بھیجنے ہوتے ہیں۔ سب سے پہلے آپ کو ایک تفصیلی درخواست لیٹر لکھنا ہوگا جسے اپلیکیشن لیٹر کہتے ہیں۔ اس خط میں آپ کو اپنی کہانی بیان کرنی ہوگی کہ آپ کی شادی کب ہوئی، آپ آئرلینڈ کیوں آئے اور مستقبل میں آپ کیسے رہیں گے۔ اس کے بعد آپ کو اپنا اور اپنی فیملی کا اصل پاسپورٹ دینا ہوگا جس کی میعاد کم از کم بارہ ماہ ہو۔ شادی شدہ ہونے کا ثبوت یعنی نکاح نامہ یا میرج سرٹیفکیٹ جو کہ وزارت خارجہ سے تصدیق شدہ ہو بہت ضروری ہے۔ اسپانسر کو اپنی نوکری کے ثبوت دینے ہوں گے جن میں حالیہ تین تنخواہ کی سلپس، پی سکسٹی فارم جو کہ ٹیکس کا ریکارڈ ہوتا ہے اور گزشتہ چھ ماہ کی بینک سٹیٹمنٹ شامل ہے۔ بینک سٹیٹمنٹ سے یہ ثابت ہونا چاہیے کہ تنخواہ آپ کے اکاؤنٹ میں آ رہی ہے اور آپ اسے خرچ بھی کر رہے ہیں۔
فیس اور پروسیسنگ کا وقت
ویزا کی فیس ساٹھ یورو ہے اگر آپ سنگل انٹری ویزا لے رہے ہیں اور اگر ملٹیپل انٹری چاہیے تو یہ سو یورو ہے۔ تاہم زیادہ تر لوگ پہلے سنگل انٹری ویزا ہی لیتے ہیں اور آئرلینڈ جا کر اپنا کارڈ بنواتے ہیں۔ جہاں تک ویزا لگنے کے وقت کا سوال ہے تو یہ کافی طویل عمل ہے۔ بیویاں اور بچوں کے ویزا کے فیصلے میں چھ ماہ سے لے کر بارہ ماہ تک کا وقت لگ سکتا ہے۔ والدین کے کیسز میں یہ وقت دو سال تک بھی جا سکتا ہے۔ اس لیے صبر سے کام لینا ضروری ہے۔ آپ اپنی درخواست کی حیثیت آن لائن چیک کر سکتے ہیں جہاں ہر ہفتے فیصلے اپ ڈیٹ کیے جاتے ہیں۔
ویزہ لگنے کے بعد کیا کرنا ہے
جب آپ کی فیملی کا ویزا لگ جائے گا تو ان کے پاسپورٹ پر ایک سٹیکر لگا ہوگا۔ وہ اس ویزا پر آئرلینڈ کا سفر کریں گے۔ آئرلینڈ پہنچنے کے بعد یہ عمل ختم نہیں ہوتا۔ ایئرپورٹ پر امیگریشن افسر انہیں ملک میں داخلے کی اجازت دے گا لیکن یہ اجازت صرف نوے دن کی ہوتی ہے۔ ان نوے دنوں کے اندر اندر آپ کی فیملی کو مقامی رجسٹریشن آفس جانا ہوگا۔ اگر وہ ڈبلن میں ہیں تو انہیں برگ کی جانا ہوگا اور اگر کسی اور شہر میں ہیں تو مقامی گارڈا اسٹیشن یعنی پولیس اسٹیشن جانا ہوگا۔ وہاں ان کی انگلیوں کے نشانات لیے جائیں گے اور تصویر بنائی جائے گی۔ اس کے بعد انہیں آئرش ریزیڈنس پرمٹ یعنی آئی آر پی کارڈ جاری کیا جائے گا۔ سب سے اچھی بات یہ ہے کہ اگر اسپانسر کے پاس کریٹیکل سکلز پرمٹ ہے تو اس کی بیوی کو سٹیمپ فور دیا جاتا ہے جس کا مطلب ہے کہ وہ آئرلینڈ میں کہیں بھی نوکری کر سکتی ہے اور اسے الگ سے ورک پرمٹ لینے کی ضرورت نہیں ہوگی۔
سرکاری قوانین اور مزید معلومات
یہ تمام معلومات آئرلینڈ کے سرکاری پالیسی ڈاکومنٹ برائے نان ای ای اے فیملی ری یونین سے لی گئی ہیں جن کی تصدیق آپ سرکاری ویب سائٹ پر کر سکتے ہیں۔ قوانین میں تبدیلی آتی رہتی ہے اس لیے اپلائی کرنے سے پہلے تازہ ترین تنخواہ کی حد ضرور چیک کریں۔ ہم نے کوشش کی ہے کہ اس کالم میں تمام باریکیوں کا احاطہ کریں تاکہ آپ کو کسی قسم کی پریشانی کا سامنا نہ کرنا پڑے۔ یاد رکھیں کہ نامکمل درخواستیں فوراً مسترد کر دی جاتی ہیں اور فیس بھی واپس نہیں ملتی اس لیے کاغذات پورے کیے بغیر کبھی اپلائی نہ کریں۔ اگر آپ مزید تفصیلات جاننا چاہتے ہیں تو ہماری ویب سائٹ وزٹ کرتے رہیں۔
